مواعظ فيلم “لا تبكي يا حبيب العمر”

القاهرة … سميرة عبد الله

فيلم “لا تبكي يا حبيب العمر” من بطولة فريد شوقي ونور الشريف. إذ كان الفنان نور الشريف عنده ورم في منطقة المخ ومحكوم عليه بالموت القريب، أمام عجز والده فريد شوقي الطبيب الجراح الذي كرس حياته المهنية في البحث عن علاج ينقد ولده الوحيد من الموت المحتوم.

لما نور الشريف عرف قال لباباه

رغم كل المعاناة الذي كان يمر بها الابن، إلا أنه لم يكن يخاف الموت، لأنه عاش أجمل وأحلى أيامه في حضن والده. لدرجة أنه قال لأبيه: “أنا مرة قريت حكاية في كتاب عن واحد راح زار بلد … فمر على المقابر … لقى على كل قبر لوحة … اللي مكتوب عليها عاش ١٦ شهر … واللي مكتوب عليها عاش ٤ أشهر … واللي عاش ١٠٠ يوم بس. فسأل ايه حكاية الناس في البلد دي؟ ليه بيموتوا صغيرين كده؟ قالو لأ … دي عدد الأيام السعيدة اللي عاشوها في حياتهم … لأننا بنحسب عمر الإنسان بعدد الأيام السعيدة اللي عاشها وبس”.

فقال نور الشريف لوالده: “أنا عشت 24 سنة سعيد وأنت السبب … خليت كل أيامي ضحك وسعادة … اديتني كل حاجة حلوة في العالم … اديتني كل اللي اتمنيته … أنا لو مت هزعل على حاجة واحدة بس … إني مش هشوفك وإنك هتوحشني … العمر بينا وبين اللي بنحبهم مش بيتقاس بالزمن اللي عشناه سَوا … ياما ناس عاشوا العمر كله سًوا لكن رصيدهم من السعادة مع بعض قليل … وناس مروا علينا وراحوا لكن سابوا ذكريات محفورة في القلب والروح بتكفي عمر بحاله … وناس فضلوا معانا العمر كله وخلوه كله ذكريات حلوة … ذكريات تفضل لآخر نفس لينا … مش بالوقت اللي بيمر من غير ما يتحسب من العمر … بكم ذكرى سبتها … كم مرة كنت السند … وكم مرة ضحكنا … وكم مرة مسحنا دموع بعض … كم مرة اديتني أمل ونورت الدنيا فعينيا بعد ما كانت ظلمة … كم مرة شلت عني الوجع وخففت حمله من على كتافي … كم مرة قلبي دق من الفرحة والونس … مش دق عشان يفضل بالإسم عايش … العمر بيتقاس بكم يوم كنا فيه سعداء … كم يوم كانت فيه أرواحنا سَوا  … رفقة وونس”.