القاهرة … سميرة عبد الله
من ساعة ما الكاكاو بقى هوت شوكلت.
والبليله بقت بينز.
والفيشار بقى پوپ كورن.
والملوخية بقت جرين سووب.
والفلافل جرين بررجر.
كله كوم و جرين سووپ دية كوم لوحدها طبعا.
و القهاوي بقت كافيه.
والقهوه نفسها بقت كوفي.
ايشي تركش وإشي اميريكن وكمان الحليب بقي ميلك.
ومن ساعة ما الكلسون بقي ليجن.
والبقسماط بقي باتون ساليه.
والفطير بقي اسمه كريب.
من ساعة ما العري بقي أوبن مايندد.
والهدوم المقطعه بقت ستايل.
وكمان بقي عندنا سنغل موذر وسنغل فاذَر برضو علشان محدش يزعل ويبقى فيه مساواة.
من ساعة ما الراجل بقي مُز.
والبنت بقت رجولة.
والعادات الشرقيه بقت بيئة.
وعبارة “السلام عليكم” بقت بلدي خالص.
من ساعة ما الخلافات بقت أون لاين.
والزعل بقي بلوك.
والضحك بقي إيموشن.
وكمان بقينا نكتب عربي بحروف فرنسية أو إنجليزية، من باب الروشنة.
ومن ساعة ما البني آدم بقى قيمته في لبسه و نوع موبايله مش في أخلاقه و احترامه.
من ساعة ما بقينا نحس بالوحدة في وسط أهالينا.
من ساعة ما القرايب بقوا عقارب.
والصحاب بقوا عِرة.
هو احنا اتغيرنا قوي قوي كده ليه؟ والناس مبقتش زى زمان ليه؟ ووكلنا بنسأل نفسنا الدنيا ليه مبقتش زي زمان يا زمن؟
الناس اتغيرت، ونسينا كل عاداتنا وأصالتنا وجذورنا وأصولنا. قطعنا أرحامنا وفقدنا إحساسنا بالسائل والمحتاج، مش شرط محتاج فلوس ولا دعم مادي. حتى اللي محتاج عطف وحنان ومجرد احساس صادق. مجرد احساس بالوجود.
